Di vê xebatê da dahûrandina helbesta Berken Bereh ya bi navê “Tu Carî Bernede Destê Evînê” hatiye kirin. Pêşîyê derbareyê helbestvan da bi kurtasî agahî hatiye dayîn, piştra dahûrandina helbestê hatiye kirin. Behsa nerîta helbestê hatiye kirin û li ser tema, ciwankarî û ziman hatiye rawestan. Berken Bereh, nûnerekî girîng yê helbesta modern ya Kurdîyê ye. Helbest bo wî qadeke azad e, ku ew helbestê wek welatê xwe pênase dike, herwiha helbesta xwe dişibîne axa xwe. Temaya vê helbestê du hestên bihêz in ku ew evîn û hêvî ne. Serenava helbestê, di serî da helbestê wek helbesteke ku li ser evîndarîya dil hatiye nivîsîn bide hîskirin jî, ji naveroka helbestê tê têgihîştin ku armanca ku bi hezkirinê yê destbikeve tê ziman. Naveroka helbestên Bereh zêdetir civakî ne. Sîtava rewşa serdema wî û civaka wî di helbestên wî da reng vedidin. Ew, li pey nûjenkirina helbesta Kurdîyê tevdigere lê vê nûkirinê li ser bingeha helbesta Kurdî ya berîya xwe pêk tîne. Herwiha ew radihêje bi dengê xwe bibe dewama nerîta helbesta kurdîyê. Ramana netewetîyê ya ku rengê hevpar yê helbesta Kurdîyê ye, di helbesta Bereh da jî xuya dibe. Bereh, vê rengê hevpar, li gorî şert û mercên serdemê, bi hêma û hênerên edebî va ristiye ku ev helbesta wî, yek ji helbesta kurdî ya modern û pêşketî, ya ku li ser rêça nerîta netewetîya helbesta Kurdîyê ye.