Mesele gerek hukuk-ı düveliye ve gerek Devlet-i Aliyye'nin kavânîn-i dâhiliyesi ve münâsebât-ı dûveliyesi nokta-i nazarından hâiz-i ehemmiyet olmakla müddet-i ömrünün kısm-ı a'zamı hidmet-i Devlet-i Aliyye'de geçirmiş ve bulunduğu memuriyetler münasebetiyle hasbe’l-vazife bu gibi mesâ'il-i mühimme-i kanuniye ve siyâsiyenin uhûd ve kavânîne ve hususiyle menâfi'-i saltanat-ı seniyyeye muvafık suretde halli hakkında i'tâ-yı rey için tul müddet it'âb-ı zihn etmiş olan bir hadim kadîm-i devlet velev ki bugün vazife hâricinde olsun bu mesele hakkındaki müstahzaratının arzını müretteb zimmet bilmeğe bast-ı mutala'ât-ı kâsırâneye mübâderet eylemişdir. Bâlâda beyan olunduğu üzere bu bâbdah çokdan beri ekseriyetle ittihâz olunmuş birkarar mevcûd olduğundan şimdi mesele-i muhtelefün fîhâ hakkında rey vermek karar-ı mezkûrun muhakemesinden ibaret olacakdır. Bina'en aleyh ol vecihle tetkîk-i meseleye girişilir.