Memleketimizin ciddî bir ihtiyâcına tekâbül etdiğini zann eylediğimiz bu mecmûayı‐beş aydan beri ma’rûz olduğumuz büyük bir gazete ve mecmûa hücumuna rağmen‐te’sîs ediyoruz. Bizim içün eski, pek eski bir emelin sahne‐i hakîkatde tecellisinden ibâret olan bu mecmûayı milletin ter‐biye‐i iktisâdiyye ve ictimâiyyesine ciddî sûretde hizmet edebilecek bir mertebeye is’âd eylemeğe bütün kuvvetimizle çalışacağız. Bu mesâimiz yalnız kendi mecmûamız olduğu içün buna karşı hissetmekliğimiz pek tabiî olan bir merbûtiyyetden dolayı değil, Osmanlı milletinin bugün mesâil‐i iktisadiye ve ictimâiyeye her şeyden ziyâde alaka‐dâr olmak mecbûriyet‐i kat’iyyesinde bulunmasından nâşi olacakdır. Mine’l‐kadîm aldığımız çürük terbiye ve buna inzimâm eden son otuz üç senelik seyyiât‐ı idareye bizi gerek kendimizin, gerek etrafımızı muhît olan küçük büyük hükü‐metlerin hayat‐ı iktisâdiyye ve ictimâilerinde zuhûr eden inkılâbât‐ı mühimmeye kesb‐i vukûf eylemekden şiddetle men’ ve mahrûm etmişdir.